La2iny .. W Ghadiny

10pm

لسة راجع من برة .. كنت في اندريا المريوطية بتغدى..
كان بقالي فترة مرحتش هناك .. المكان فعلا وحشني .. كل حاجة لسة زي ما هية .. الراجل اللي واقف يشوي الفراخ .. الستات اللي قاعدين يخبزوا العيش علشان يجيلنا سخن.. يااه .. اكتر من سنتين ماروحتش هناك .. يمكن رحت اللي في الساحل الشمالي اكتر من 10 مرات في السنتين دول .. بس اندريا ده كان فعلا واحشني ..و ركوب الحمار اللي كان هناك دايما لما نروح ( ملاقيتش الحمار المرة دي !! .. ياترى ايه الحصل للحمار!)
يمكن كمان اللي خلاني عايز اروحوا اكتر .. اني عارف انك كنتي لسة هناك .. يا ترى عملتي ايه يوميها .. قعدتي فين ؟؟ ..ماحكيتيليش انت!!
يا ترى كنت قاعد في نفس المكان اللي كنتي قاعدة فيه؟؟
ممكن حتي يكون جالي نفس الطبق .. و الشوكة و السكينة اللي كلتي بيهم!!
حاجات كتيرة جت في بالي و انا قاعد هناك .. الضحكة ماسبتنيش لحظة .. مجرد اني عارف انه يمكن يكون كل ده خلاني مبسوط
- ده طبعا غير ان الاكل حلو يعني و دي حاجة تبسطني- .. و انا خارج من هناك .. سلمت على الستات اللي بيخبزوا العيش .. قلتلهم تسلم ايديكوا .. و قالولي بالهنا و الشفا..
اه بعد ما كلت .. طلبت شاي بالنعناع .. ياااااسلام على النعناع لما يبقى حلو!! .. ولا ميييت ايرل جراي!!

بجد اتبسطت اوي هناك..
كل حاجة كانت حلوة .. الاكل .. الجو ..حتى احساسك انك مبتسم .. فعلا احساس جميل