حاكتب .. في يوم

عايز اكتب .. مش عارف عن ايه بالظبت ..
بس حاسس اني عايز اكتب ..
كان في قصيدة لـصلاح جاهين اسمها .. "قصيدة"
بيحكي فيها عن حاجات كتير عايز يكتب عنها في يوم من الأيام ..

ساعات كتير انا ببقى عامل كدة تمام ..

عايز اكتب عن حاجات كتير قو ي .. بس مش لاقي الكلام ..
او في بعض الأوقات .. تعودي على السكوت .. بيخليني مش باكتب ..
ساعات مش باكتب يمكن علشان عارف ان اللي ممكن يكون بيقرى البلوج ده .. ناس تعرفني شخصيا .. يمكن مش باكتب .. علشان -مش بخاف- لكن مش بعرف اجاوب عن بعض الأسئلة - زي ليه و امتا و مين - مع اني انا نفسي بسألهم ساعات .. لكن يمكن مع اني بسألهم .. الا اني مابحجرش على حرية حد في عدم الرد .

يمكن في ساعات مش باكتب .. علشان شايف ان اللي باكتبه ممكن يكون ليه عواقب انا مش حاببها .. و علشان كدة ساعات كتير بأحتفظ باللي بكتبه لنفسي ..
اه ايوة .. ساعات بخاف من الكتابة .. و علشان كدة ساعات كتير بتبنى موقف "لا تعليق" لانه لو الحاجة اللي حاكتبها حاسس انها ممكن تلخبط الدنيا .. اللا اني مش ممكن اكتب حاجة انا مش مصدقها .. فا بسكت .

يعني شوف .. قلت عايز اكتب .. و كتبت كل اللي فوق ده .. عن اسباب عدم الكتابة .. !

و مع ذلك .. انا لسة عايز اكتب .. و فعلا بحاول كتير اني اغير ده .. و اكتب اللي عايز اكتبه من غير ما أفكر .. اكتب و خلاص

اديني بحاول اهه .. و اكيد اكيد في يوم ..
حاكتب

بقالي كتير قوي ماكتبتش اي حاجة هنا ..
الكتابة بتوحشني فعلا ..
بس ليه الكلام بيهرب مني لما أدور عليه ..
فقررت من شوية وقت كدة ..
انه لما يهرب .. مادورش عليه
*****
نصيحة لكل حد عايز يحافظ على اللي بيحبهم ..
ماتحاكمهمش ..
انصح من قلبك ..
بينك و بينهم
*****
عندي رغبة قوية اني أغير الـTemplate بتاعة البلوج
و يمكن كمان بتاعة حياتي ..
ينفع ؟؟!
*****
ممكن سؤال ؟
هو انا عايش في انكار لحقيقة الواقع ؟
ولا انا فعلا كدة ..
دايما بعرف اصًلح نفسي ؟
*****
الصيف خلاص دخل ..
بكل حره و دوشته ..
بس في وسط دخوله ..
الشتا افتكرنا ..
بحبة مطر خبت الناس في بيوتها من تاني
مستنييناك يا شتا ..
ماتنسناش
*****
حتى في عز لخبطة الدنيا ..
و انت مش معايا هنا
بفتكر ابتسامتك ..
و أطمن
*****
شفتي الولد الخلبوص عملها ..
و بقى أب ..
و خلاكي جدة ..
كنت حاتفرحي قوي لما تشوفيه
ايه كنت دي !!
ما انت أكيد شفتيه ..
و فرحتي ..
يا أنًا
*****
الحاجة اللي اتعلمتها ..
و اتأكدت منها تماما ..
اني لسة ..
بتعلم
*****
يا مصر ..
اذكري ..
و احذري