" انت اتغيرت قوي"
"انت ماكنتش كدة ايام الكلية"
"انا ماكنتش اعرف ان انت عندك الافكار دي و التوجه ده .. ماكانش باين خالص"كام مرة سمعت الكلام ده في السنتين دول !
كتير .. يمكن ماقدرش افتكر قد ايه ..
بس بجد .. في كل مرة كنت باسمع الكلام ده .. منت بحس احساس غريب .. احساس اني عايش فعلا .. مش عايش و خلاص
السنتين اللي فاتوا .. و بالذات من بعد ماخلصت الدراسة في الكلية .. اتعرضت لحاجات كتير ماكنتش اعرف عنها اي حاجة قبل كدة .. و اتعلمت حاجات كتير قوي .. غيرت تفكيري و خلتني اشوف فرص جديدة .. عرفتني حاجات مش عارف او مش قادر اتخيل كنت هاكون عامل ازاي منغيرها ..
التغيير مش شرط يكون عن طريق القراءة بس -و ان كان ليا انا شخصيا القراءة من اهم و امتع المصادر- لكن التغيير بييجي عن طريق كل حاجة حواليك .. و بيكون تأثيره في كل حاجة برضه
يعني ايه ؟؟
يعني افتح عقلك و افتح قلبك للتغيير .. افتح عقلك للدنيا من حواليك .. بص تاني على الحاجات اللي بتشوفها بقالك سنين و بتقول عليها "عادي" .. افتح قلبك و بص لنفسك من اول و جديد .. كأنك لسة بتشوفك لأول مرة .. اتعرف عليك كويس شوف ايه بتحبه و ايه مابتحبوش و ليه .. شوف نفسك في ايه .. ماتكبتش حلمك جواك و تسكته .. اسمعه .. و فكر ازاي تقدر تحققه .. اكيد هايكون في طريقة .
من حوالي سنة و شوية .. كنت مريت بتغييرات في طريقة تفكيري .. نتيجة مواقف معينة و ابتديت ابص للأشياء بمنظور مختلف ..
في ثواني فتحت عقلي و قبلت فكرة ماكنتش جت على بالي قبل كدة .. قلت خليني اجرب .. و جربت فعلا .. و التجربة فتحتلي الباب لفرص كثيرة كانت بالنسبة لي مش اكتر من احلام بتمنى اني في يوم من الايام اكون محظوظ و اقدر احققها -مع اني ماكنتش جربت اصلا!-
في وسط التجربة الجديدة دي .. اتعرفت على طريق .. كنت سمعت عنه لاكني ماشفتوش قبل كدة .. اتعرفت عليه عن طريق حد دلني .. و قالي طيب جرب .. و رحت فعلا و جربت .. و اتعلمت فيه حاجات كتير قوي عن الدنيا .. و الاهم عن نفسي .. و لحد النهاردة .. بشوف تأثيره عليا و قد ايه كانت خطوة مهمة اني اخدها في الوقت ده .. مع اني قبليها بيومين .. ماكنتش اعرف عنها اي حاجة !
من سنة يمكن فكرت اني اغير مجرى شغلي .. مع اني كنت شغال في مكان كويس .. و باخد مرتب محترم .. قررت انه لأ مش ده اللي انا عايزه -على الأقل دلوقت- و قعدت مع نفسي لمدة اسبوعين .. بشوف انا عايز ايه .. و انفع في ايه .. و اللي انا عايزه ده .. اقدر احققه ازاي .. في الفترة دي اتعرفت على نفسي بشكل كبير .. احنا فعلا ممكن نفضل عايشين حياتنا كلها .. منغير مانعرف نفسنا .. بنعمل اللي اتقال اننا مفروض نعمله .. منغير مانعرف احنا عايزين ايه اصلا !
النهاردة بعد ما عدى حوالي 8 شهور .. حققت حوالي 75% من الاهداف اللي كنت حاططها للفترة دي .. و الحمد لله لسة بحاول احقق الباقي .. و عارف انه طالما انا مؤمن اني هاوصله .. يبقى ان شاء الله هاوصل.
من اكتر الحاجات اللي لما بفتكرها ببتسم قوي .. ان في برنامج الأساسية في شغلي الفترة اللي فاتت .. من سنة ماكنتش اعرف عنه اي حاجة .. و اتعلمته في شغلي القديم خالص مش علشان محتاجه .. انما علشان حسيت ان البنت اللي عندها عشر سنين و لبسة لبس الباليرينا و بترقص للعب و العرايس بتاعتها صعبانة عليا قوي .. و قلت لأ لازم اجيبلها قاعة اوبرا ترقص فيها .. و ده كان اول خطواتي في التعامل مع البرنامج !
"انت واخد بالك من الفرق في كلامك بين اول ماسبت شغلك القديم و كنت بتدور على ايه الطريق اللي مفروض تمشي فيه .. و الكلام اللي بتقوله النهاردة و انت بتختار بين فرصتين في المهنة اللي انت اخترتها لنفسك ؟"
قد ايه لما سمعت الكلام ده حسيت اني فعلا لازم احمد ربنا على الفرص الكتير اللي شفتها و خدت بالي منها مع انها في العادي كانت هاتفوت من قدامي ولا كأني شفتها
طيب انا عمال بقول الكلام ده ليه و عمال ارغي كل ده ليه ؟
اولا علشان اعرف نفسي انا فين النهاردة .. و امبارح كنت فين .. و ليه انا هنا النهاردة .. و انه لولا اني فتحت عقلي و قلبي للتغيير ماكنتش عمري هاكون هنا .. و انه لو في يوم حسيت اني كدة خلاص انا اتعلمت كل اللي مفروض اتعلمه و ان مفيش حاجة تانية محتاج اتعلمها .. ده هايكون اليوم اللي هارجع فيه مش للصفر .. لأ .. دا هايكون اليوم اللي مش هلاقي فيه الصفر اصلا و علشان كدة .. مفيش غير طريق واحد بس .. اتعلم .. من كل حاجة كبيرة او صغيرة اشوفها .. و افضل باصص لقدام ..
الحاجة التانية .. ان لو في حد بيقرا شوية التخاريف اللي بكتبهم دول .. عايز اقول له .. ارجوك ماتخفش .. ماتخفش تجرب .. ماتخفش من الحاجة الجديدة .. ماتخفش من التغيير .. سيبك من موضوع ان اللي تعرفه احسن من اللي ماتعرفوش .. و انك ماتقدرش .. ماتخليش عقلك يضحك عليك و يقول لك انك مش هاتقدر .. لأنك ببساطة شديدة .. لو جربت و كنت مصر انك تحقق هدفك .. هاتقدر قوي كمان .. و هي خطوة واحدة .. و هتلاقي في حاجات كتيرة طهرت قدامك و فرص كتير انت ماخططلهاش اصلا ظهرت قدامك و بقت بين ايديك .. و هاتحس قوي بثقتك في نفسك و انك تقدر تحقق اللي بتحلم بيه .. و يوم ما ده يحصل .. و فعلا تبتدي تتغير .. خد بإيد اللي حواليك .. ساعد الناس انها تحقق حلمها .. و تأكد ان ده هايرجع عليك بخير .. حتى لو انت مش منتظر من وراه حاجة.
حاجة اخيرة بقى .. هي مش حاجة انا هاقولها من عندي .. هي كلام مقتبس عايز اكتبه ..
الاول
"You Can, If You Think You Can"
التاني بقى و ده بطل اساسي في الحدوتة اللي فوق دي ..
"نقدر ؟ .. طبعا نقدر"