الى ..
اجمل طفلة في الدنيا .. احلى ضحكة بتنور كل حاجة .. اصفى و اطيب قلب قابلته في حياتي ..
كتير جدا ماكنتش مصدق .. انت حقيقة ؟؟ .. لو تسأليني .. انا ماشفتش حد زيك قبل كدة .. !
احلى طفلة في الدنيا .. يا ام عيون مكسوفين و حلوين .. و من اقل حاجة غرقانين .. لأن اللي في قلبك .. مش بيعرف يستخبى .. و بيبان بكل صفا ..
احلى طفلة في الدنيا .. يا أم ايدين بترتعش في كل مرة .. يا أم سلام حنين بيقول ميت الف كلمة من غير كلام ..
احلى طفلة في الدنيا .. يا أم احلى سكوت .. ياللي باسمع في سكوتك كلام صافي ابيض رقيق ماكنتش اصدق انه موجود ..
احلي طفلة في الدنيا .. يا أم احلى نظرة .. نظرة بتدوبني و بتملى عنيا دموع .. نظرة تطبطب عليا و تطمني .. نظرة تفتن عليكي و تقوللي كل اللي جواكي .. نظرة كلها حنية على كل اللي حواليكي .. نظرة بتخلي اي حاجة تيجي عليها .. احلى حاجة في الدنيا ..
احلى طفلة في الدنيا .. يا أم نظرة ساعات حيرانة و متلخبطة .. نظرة بتخليني ابقى عايز اخدك في حضني .. و اخبيكي .. و اطبطب عليكي .. اقلك كله هيبقى كويس .. لان انت اكتر حد كويس ..
احلى طفلة في الدنيا .. يا أم احلى ضحكة بتملاني امل .. و تنور الدنيا حواليكي ..
احلى طفلة في الدنيا .. يا أم اجمل نظرة غيرة في عنيكي .. بتبقى هاتطلع من عينك و تحارب كل الموجودين و تموتني من الضحك .. مع انك متأكدة .. قلبي ملكية خاصة ليكي و بس ..
احلى طفلة في الدنيا .. يا احلى حد بيتصالح .. يا اجمل حد يشكر حد و هو عارف ان الشكر مالوش مكان لان الحد ده كله ليه اصلا ..
احلى طفلة في الدنيا .. يا أم دمعة بتغسل قلبي .. و تموتني و تحييني ..
احلى طفلة في الدنيا .. يا احلى طفلة مبسوطة .. و فرحانة .. بضحكة تملى الدنيا موسيقى و ورد و لوللي بوبس و شوكلاتة بالكراميل زي اللي بتحبيها .. بعيون شقية منورين بتزغزغ قلبي و تخليه ينور ..
احلى طفلة في الدنيا .. يا ارًق .. و اصدَق .. و اطيَب قلب ..
احلى طفلة في الدنيا .. يا أم احلى صوت يقولي صباح الخير .. و اصفى صوت يوعدني بأحلام جميلة .. و يقولي كل حاجة حاتبقى تمام ..
احلى طفلة في الدنيا .. يا احلى حاجة عرفتها .. يا كل حاجة عرفتها ..
احلى طفلة في الدنيا ..
وحشتيني ..