القلب .. و ما يريد

في الدنيا بنقابل كتير ..
بنحب .. بنكره .. نبعد .. نقرب ..
قالوا زمان ..
القلوب و ما تريد ..
و انا قلبي رايد قلب ..

يفهم و يقدر .. و يغلط ساعات ..
يسامح .. لكن في الحق .. ماهوش سلبي ..
في الفرحة .. و الحزن .. الاقيه جانبي ..
بيمد ايده لواحدة عاجوزة .. يعديها الطريق ..
يضحك من قلبه لضحكة طفل ..
القطة لو شافها عطشانه .. هايمد ايده تبل الريق
يشكر من قلبه الناس .. و يرد الخير بالخير

وقت الشدايد قدها ..
لكن قلبه ماهوش حديد ..
ايده مايرفعهاش غير في الحق ..
و لا ابدا على عاجز عن رد ..
ما بيصطدش العصفور علشان يلعب
ولا يضربش بقسوة حمار

يعرف يفكر و يتعلم ..
و ساعت يبقى مجنون ..
طفل صغير عنده 10 سنين ..
بيحب يمشي تحت المطر و فــ ايده ايس كريم ..
يلعب مع الموج على الشط و مايقلش .. اصلي أخاف اتبَل ..

في قلبه حلم عايش عشانه ..
من قلبه بيدي .. و مش مستني الرد
و عارف ان خيره في خير غيره ..
و ان الواجب .. مش احسان ..

قالوا زمان .. القلب و مايريد ..
و انا قلبي رايد ..
رايد انسان

ا ح ل م

قبل ما تحلم فوق .. علشان تبقى عارف انت بتحلم بإيه ..
بس لما تحلم .. صدق حلمك قوي ..
خليك وراه ..
اياك تسيبه يهرب منك ..
و اوعى .. اوعى ..
في وسط ما انت بتحاول ..
تسمع صوت حد بيقولك .. ده مجرد حلم .. عمره ما هايتحقق
اوعى تصدقه ..
و تبص حواليك .. و تسيبه يهرب منك ..
و فجأة .. تلاقي نفسك وقعت من سابع سما ..
زي في افلام الكارتون ..
تقع من فوق السحاب.

مش هاننسى

We Wont Forget