بين قانا .. و قانا

1996
انا لسة فاكر ..
كنت في تانية اعدادي ..
كلام كتير .. في البيت .. في التلفزيون .. في المدرسة بين المدرسين ..
عن اطفال اتدبَحوا .. عن بيوت اتهدمت .. عن زوجات انرملت و اولاد اتيموا .. في مذبحة قانا
كلام كتير حرك جوايا مشاعر كثيرة .. مشاعر غضب و تعاطف و حزن ..
ماكنتش عارف ازاي اتعامل معاها .. او اخرجها ..
و الاسوأ .. ماكنتش اعرف انه بعد فترة .. المشاعر دي هاتبقى شيء عادي .. زي الشاي باللبن اللي اتعودت اشربوا اول ما اصحى من النوم ..

2000
كنت انا في تالتة ثانوي ..
و كان محمد الدرة طفل خارج مع ابوه .. و فاجأة .. و من غير مايكون معاه حتى حجر .. لقى رصاص الغدر مصوب نحيته .. و نحيت ابوه .. حاول الاب الاشارة لعساكر الغدر بالتوقف .. لكنها بالنسبة ليهم .. كانت مجرد لعبة .. زي الروليت الروسي ..
كلام كتير في البيت .. كلام كتير في التلفزيون .. و في القنوات الفضائية .. كلام كتير في الشارع ..
كلام كتير في المدرسة مع المدرسين .. مسرحية المدرسة عن فلسطين .. في وسطها مشاهد فيديو للاعتدائات على الفلسطينيين .. و تسجيل لاوبريت "الحلم العربي"
مشاعر كتيييييير ..
خرجنا في مظاهرة نظمتها المدرسة .. و هتفنا بحرية فلسطين .. و حذرنا الغادرين ان جيش الامة هيرجع من تاني و يسترد القدس..

2000-2003
كنت في الكلية بقى ..
خرجنا في كذا مظاهرة تضامنا مع فلسطين .. مع الاحساس بالغضب الممزوج بالمرارة من اللي بنشوفه كل يوم في فلسطين ..

2003
السنة اللي اناكل فيها التور الابيض بمباركة جميع التيران ..
غزو العراق ..
متابعة اخبار الحرب على القنوات الفضائية و صفحات الانترنت ..
مع وعود امريكية بتحرير العراق من الطاغوت ( ايوة هو كان فعلا مفتري ) صدام حسين .. و تحويل العراق الى باريس الشرق ( الشرق الاوسط الجديد طبعا ) ..
مشاعر غضب داخل حرم الجامعة .. سواء المؤيدين للحرب او الرافضين ..( المؤيد غاضب من تخلف الرافضين .. و الرافضين .. رافضين لمبدأ تدخل قوات اجنبية لحل الازمة )
بما اني كنت من الرافضين للتدخل الأجنبي و من المؤيدين للاطاحة بالنظام الظالم " اي نظام ظالم"
فقد شاركت في الاعتصامات و المظاهرات ( بدون عنف ) التي رفضت تدخل قوة اجنبية " و بالاخص امريكية"
و نقاشات حتى بين افراد الاسرة .. بين مؤيد و معارض للمنطق الامريكي للغزو ..
نقاشات كتيير .. متابعات كتير .. مظاهرات كتيير ..

2006
الاعتداء الاسرائيلي القذر على لبنان ...
صمود الشعب اللبناني صمود بطولي بجد .. بجد اتحاد طوائف لبنان ده اكبر دليل على انهم شعب .. يستحق الحياة !
و في تكرار لمذبحة قانا ..
قصف الغادرين قانا ..
ليقتلوا النساء و الاطفال ..
في ظل صمت عربي اقل ما يقال عنه انه .. مخييف !
كلام كتير في كل حته ..
مظاهرات تضامن في كل حتة ..
محاولات خايبة من الانظمة للتحرك "الخايب" في محاولة ان شكلهم ميبقاش ..... وحش
مشاعر غضب في الشارع العربي - و الدولي في بعض الاحيان- اسنكارا للحرب و الاعتداء الصهيوني القذر ..

هو ده حالنا .. من 1996 الي 2006
10 سنين ..
هو ده حال العرب .. " مسلمين او مسيحيين"
و كل اللي بنعمله ..
البكاء .. الغضب .. اعتصامات .. مظاهرات .. مظاهرات .. مظاهرات ..
كلام .. كلام .. كلام
و دمتم ..

سلبيتنا .. و سكوتنا ..
هما اللي هيقتلونا ..

من قانا الى قانا ..
من هوان الى هوان ..
من ذل الى ذل ..

و هو ده حالنا ..
بين قانا و قانا .. الف قانا ..
و لو فضلنا على سكوتنا ..
هايبقى فيه 100 الف قانا جايين في الطريق

« ان الله لا يغير ما بقوم حتى يغيروا ما بأنفسهم »
سورة الرعد : الآية 11