قول معايا .. قول بجد

يوم التلات اللي فات ده .. و بعد يوم طويل و مشاوير و غدا برة البيت و لف ..
رحت على الساقية انا و واحد صاحبي علشان نحضر حفلة وجيه عزيز ..
الحفلة دي انا كنت فعلا مستنيها من فترة مش قلبلة .. و المفاجأة - لصاحبي على الأقل- ان دي كانت اول حفلة احضرها ليه ..
وجيه عزيز عرفته من حوالي سنتين عن طريق واحد صاحبي كان جابلي اغاني ليه .. و من اول ماسمعته .. علقت كلماته و موسيقته معايا جامد اوي .. يمكن لأنه قريب من المزيكا العربي اللي بحبها .. سيد درويش و الشيخ امام و منير .. و اختياره للكلمات كمان مميز قوي ..

من و انا في السكة للساقية .. وانا بدنن

قول معايا قول بجد ..
هي عيشة ولا موتة .. ولا فوتة في حارة سد !
قول لحد اي حد

من الحاجات اللي احترمتها جدا .. ان وجيه عزيز و فرقته كانوا على المسرح الساعة 9 بالظبط منغير تأخير !

ابتدى وجيه عزيز بلعب سولو على العود .. هو ليه طابع خاص اوي في لعبه عالعود

و ابتدى بعد كدة يغني .. اللي لفت نظري و كنت مستغربه قبل بداية الحفلة .. عدد الناس الكبير .. انا ماكنتش متخيل ان حفلة لوجيه عزيز يكون فيها العدد ده .. بس طلع ليه جمهور كتير و كبير .. و من الواضح ان اغلبية الناس دي متابعة اعماله .. و حفلاته ..

اغلبية الاغاني اللي غناها .. كان الناس بيغنوها معاه و في كتير من الاوقات كان هو بيكتفي باللعب عالعود و الناس هي اللي بتغني .. في تفاعل رائع بينه و بين الجمهور ..
و كأن وجيه عزيز حاسس باللي في قلب كل اللي كانوا موجودين ..
الناس عايزة تتكلم .. و عايزة تتسمع .. عايزة تغني .. منغير ماتحس انها مكسوفة .. او اكتر من كدة .. انها خايفة !

قول لحد اي حد ..
حد رايح حد .. حد غايب .. حد جاي
حد لسه فينا فايق .. حد حي

غنى وجيه عزيز كمان اغنيتين لمنير .. حاضر و الفرح شاطر

و انا لسة قادر .. في الحزن افرح هييه

الطريقة اللي الناس كانت بتغني بيها - و انا كمان- تحسسك قد ايه الكلام كان لامسهم .. و بعد فترة من الغنا و المزيكا .. اغلب الناس كانت "اتدفست" في كراسيها .. و فردت رجليها و نزلت بجسمها لتحت .. تحس ان الناس نفسيا كانت في حالة راحة .. ماحدش مكسوف يغني .. ولا يصقف و لا انه يقول ياسلام بصوت عالي و يتنهد على سولو عجبه او كلمة لمسته من جوا .. الناس كانت حاسة انها كلها في مركب واحد .. احاسيسهم واحدة .. حتى همهم قبلوا انهم يشاركوه بينهم .. منغير كسوف .. منغير قلق من تقبل الناس ليهم

ياولاد خالات ياولاد اعمام ..
البرج بحري في الغرام ..
و ال"الجلب" من جوا الصعيد ..
و النيل وطن ..
النيل وطن

كانت اول حفلة احضرها لوجيه عزيز .. لكن بالتأكيد مش هاتكون الاخيرة ان شاء الله ..

الحالة اللي كان الناس فيها .. لوحدها كافية انها تخليك تحضر حفلة زي دي في وسطهم .. و "تتدفس" جوا قلوبهم

قول ياعم ..
قول يا هم ..
قول .. لحد لسة فينا عنده دم

خلصت الحفلة .. قامت الناس علشان تروح .. الناس ماشية بخطوات ضيقة .. على وشوشهم ابتسامة طالعة من جواهم قوي .. بيسوعوا لبعض الطريق و بيستنوا بعض .. و لسة بيدندنوا بكلمات الاغاني ..
طلعت انا ركبت العربية .. و كان لسه فيه اغنية مستنيها ماسمعتاهاش .. قلبت التراكس لحد ماجبتها .. و قلت لصاحبي بنبرة صوت تدل على مدى اهمية اللي هاقوله .. "اسمع بقى وجيه عزيز .. و هو بيغني كلام عم فؤاد "

فنان فقير على باب الله ..
الجيب مافيهشي ولا سحتوت ..
والعمر فايت بيقول آه ..
القطر فايت بيقول توت ..
صحيتني ليه يا شويش يا شويش ؟؟
دانا كنت سارح في الملكوت .. لما بنام بحلم و بعيش ..
لما بفوق .. مابافقش .. بموت
و تقول عليا كبير السن .. و انا في قلبي ولد كتكوت
و تشوفني ببكي .. و بنعي و آئن
و الدنيا لسة بنت بنوت