~ تلك الصباحات ~

كالعادة اصحى قبل المعاد ..
ابص في التليفون علشان اعرف الوقت
One New Message الاقي مكتوب ..
افتحها و انا متأكد انها منك من قبل ما اقراها ..
ابتسم ابتسامة عريضة ..
اقوم من السرير بنشاط غريب ..
ابتسم لنفسي في المراية .. و اقول لي " صباح الخير"
اطلع كباية النسكافيه من التلاجة ..
احط عليها المياه السخنة و اللبن ..
ادوقها .. مممم .. ياسلاااااام على كباية النسكافيه لما تبقى مظبوطة
اشرب النسكافيه بتلذذ مع كيك ..
ابتدي اجهز علشان انزل ..
البس تي شيرت .. و اضحك لأني عارف الاستغراب اللي هشوفوا في عيون الناس ..
غالبا بيقولوا عليا مجنون .. بس انا ولا بيهمني ..
امسك " العطر الذي .." و اضحك لما افتكر اليوم اللي اديتهولي فيه و كنتي مخبياه ..
ابص لنفسي في المراية تاني .. ابتسم تاني ..
اتوكل على الله و اتجه لباب البيت ..
اخرج اضحك للشمس .. و الاقي نفسي بدندن ..
صبح الصباح ..
فتاح يا عليم ..
الجيب مافهشي ولا مليم ..
بس المزاج .. رايق و سليم ..
باب الأمل .. بابك يا رحيم

جميلة تلك الصباحات .. لما تحس ان الدنيا كلها .. بتضحكلك