سلم لي عليا

صدفة شاهدتني
في رحلتي مني اليّ
مسرعا قبلت عيني
وصافحت يديّ
قلت لي : عفوا فلا وقت لدي
أنا مضطر لأن اتركني
بالله سلم لي علي

-احمد مطر

لاقي نفسك الأول .. هاتعرف انت عايز ايه ..
كلمة اتقالتلي النهاردة .. من حد قريب مني قوي ..
ياه .. انا فعلا كنت عايز الاقي الكلمة دي ..
كنت بدور عليها من الصبح ..
قعدت اتكلم قد كدة ..
عن نفسي و عن الدنيا ..
كلام كتير قلته .. عن دنيا نفسي كانت تكون بسيطة .. ابسط من كدة بكتير ..
كلام كتييير ..
بس بجد مش ده اللي كنت بدور عليه ..
اللي كنت بدور عليه .. هو انا !
قعدت اقول حاجات كتيرة .. بس ياترى لو حصلت .. هلاقي نفسي فيها ؟؟
فعلا السؤال هو .. انا فين ؟؟
حد شافني ؟؟

*********

بعد ما سمعت الكلمة دي " انت لازم تلاقي نفسك الأول "
بصيتلي كدة ..
بجد انا مين ؟؟
طيب اعرف ازاي ؟؟
مش بيقولوا الواحد بيبقى زي اصدقائه ؟؟
بصيت على اصدقائي ..
برده ماعرفتش ..
فيهم كل الأنواع ..
المؤدب .. و الشقي ..
المتدين .. الخلبوص
الشاطر .. واللي مكبر دماغه
العاقل .. و المجنون
و فعلا كلهم صحابي !!
طيب انا فين برده !
انا كل دول ؟؟
فعلا ساعات بحس اني كل دول !!
ساعات ببقى عاقل جدا ..
و ساعات ابقى لاسع فعلا !
يعني القصد من ده ..
لما بصيت على صحابي ..
برده ماعرفتنيش !
**********
يمكن انا مش موجود ؟؟
يمكن انا مش لاقيني .. علشان انا لسة ماظهرتش ؟؟
يمكن لسة فية حاجة هاتظهر .. و تبقى دي انا الحقيقي ؟؟
يمكن مش عارف بجد !
*********
لأ ..
انا موجود اهه ..
اكيد فيه حاجات لسة هاتظهر ..
بس ماقدرش ماشوفنيش برده بالطريقة اللي انا فيها النهاردة ..
********
انا فعلا كل دول !
انا مجنون و عاقل (ساعات ) .. شقي و مؤدب .. ساعات اعمل حاجات غلط .. و ساعات ابقى باعمل الصح .. علشان هو صح مش علشان عايز حاجة من وراه ..
********
انا كل دول .. و فيه كتير زيي كدة ..
الناس اللي حوليا فعلا اثروا فيا .. و "اثروا" التجربة بتاعتي و حياتي ..
و ليه مش لاقيني .. لاني مش شايف الطريق ..
لأن الطريق لسة مش باين ..
انا عارف انا عايز ايه ..
بس مش عارف الطريق منين ..
و مش عارف الطريق منين ..
لأن للأسف .. النور عندنا قاطع .. و مع ذلك بندفع الفاتورة كل يوم ..
*********
بس انا مش قلقان .. و مش خايفف ..
لأني عارف و متأكد اني هلاقي الطريق ..
يمكن ادور عليه شوية كتير ..
بس هلاقيه في الآخر ..
بجد النهاردة .. و انا باصلي ..
قلت ل نفسي ..
اكيد هتلاقي الطريق ..
لأنك عارف فين النور .. حتى لو كان مين اللي قاطع عنكم النور ..
فيه نور اقوى ..
النور مش ممكن يموت ..
و احنى مش هانضيع ..
*********

انا عارف اني هلاقيني ..
و اول ما هلاقيني ..
هاسلملي عليا ..
و كل واحد هيدور كويس " في الاتجاه الصح بالنسبة له "
هيلاقي نفسه ..
و يسلمله عليها ..
و يمكن نتقابل كلنا في حتة ..
و نسلملنا كلنا على نفسنا

The Trick .. Is 2 Never Lose Hope